離島及郊外攻略

真・水果雪條 冬天涷冰冰，最好就同你另一半黎一個Ice Lolly Challenge. 而天寒地涷嘅天氣，我竟然發現長洲嘅洲啤工房門口有人排隊買雪條。於是我就去試一試呢條水果雪條。 唔好講味道，淨係外型已經夠討好，青色密瓜配橙黃蜜桃，仲有朵奇異果花喺中間。四個字：賞心悅目。 材料有新鮮密瓜、蜜桃、菠蘿同奇異果。真係好Fresh，無糖無色素。一啲都唔甜，咬落水果道非常清甜。啱晒去邊都要食水果嘅我。（小提示，由於雪條太涷，建議等3, 4分鐘先食味道會更好！） 呢個自家制嘅真・水果雪條其實人氣一直高企，係店內最熱賣嘅雪條，如果你要我用12蚊黎考慮食一杯超artificial 嘅M記麥旋風定係呢條真・水果雪條。 我諗我啞都識答你係後者。 當我讚完看鋪姐姐啲雪條後而又知道我係holimood 嘅小編後，立即熱情送多以下2支雪條俾我⋯⋯影相。 除左密瓜打汁做Base, 仲有西瓜汁。材料一樣。（未食，等大家Comment） 冰水果串（$20)，材料有提子，西瓜，菠蘿，密瓜，蜜桃。其實味道同雪條差唔多，但啖啖果肉，實在係爽。但天氣實在太涷，大家小心食到痴住條脷。再次溫馨提示，等3, 4分鐘先食，味道更佳，更安全。 洲啤工房 地址：長洲東灣道16號

懷舊風味 – 新照記 因為傳媒的大量報導，作為羊群一員的我當然不免俗地來了長洲的新照記尋找回憶中的糕點，購買期間跟新照記的婆婆及姐姐們有了以下的對話： 我：「你哋成日都好多雜誌介紹，好出名喎，我朋友好鍾意食你啲芝麻糕架。」 婆婆不忍失笑：「其實我哋開左十幾廿年，係呢幾年先多人識咋嘛。」 我：「你哋除咗啲糕之外，聽講啲特大雞脾，$25 一隻嗰啲都好出名架喎！」 姐姐繼續說：「啲雞脾賣咗咁多年都無人講，係呢排先多人嚟買，其實咪又係嗰啲雞脾。其實啲野好唔好食係啲人寫出黎咋嘛。」 那一刻我完全醒過來，簡直一言驚醒夢中人。當我驚魂未定之際，也不忘買糕點回去孝敬父母。 於是我就再問：「咁你覺得你呢度最好味係乜嘢呢？」 姐姐猶疑了兩秒，指著以下的芋頭糕。 由食物說到度假屋，東灣路多年的變遷，還有我家鄉的芋頭糕。不知不覺間便花了十多分鐘來買兩件簡樸的芝麻糕。 新照記其實除左芝麻糕外，仲有紅荳糕、桂花糕、馬豆糕、綠豆糕、南瓜糕、馬蹄糕、紫米糕……總之都係懷舊系列的糕點。   齒頰間留下的味道不只是甜味，是古早味。糕點的味道不是我此行的重點，而是尋找童年所吃過的﹑慢慢被時間沖淡的味道。 地址：長洲東灣道18號 電話：2986 9006

Sawadee Club 長洲小手信之選 Sawadee Club 一聽就知道是一間主打泰式手工藝品的小店。主打泰式手工平安手繩，衣飾，拖鞋。 小店主打嘅平安手繩全部由泰國入口，老闆話沖涼游水都唔會甩色，同大陸貨無得比。價錢由＄6至＄10 咁多年都無加過價，仲要有過百款可以慢慢揀。 黎到長洲一定要買番條，極有小島風情。 但 Sawadee Club 令我最難以忘懷嘅唔係又平又靚嘅手繩，而係鎮店之寶”肥老闆”。 小店入面全部貨品都係肥老闆定期到泰國親手揀選。而佢嘅服務更加係獨步長洲。 無錯，就係以肥老闆專業嘅Fashion Sense 幫你襯色。只要一俾佢望到你嘅膚色，佢就可以用九秒九嘅時間幫你搵到條至Match 你嘅平安手繩。 老闆見我黑黑實實，兩下就拎左條充滿巴西風情嘅手繩幫我帶起。陽剛味即時提升十倍。 除左襯手繩，肥老闆襯衫都頗有心德。而佢手持嘅呢件就係泰國入口嘅純綿T-shirt, 老闆叫我摸摸衣料，果然一如佢所講很柔，很白，很舒服。 同HXM 嘅 T-Shirt 真係有分別，佢仲拍曬心口話呢D衫唔焗唔起粒，國貨無得比。可惜當日見唔到有啱我Size, 如果唔係我都已經買番件。 而老闆手上呢隻拖鞋亦唔係一般嘅拖鞋。傳說有好多番頭客特登番黎買。你地又見唔見到有D乜野特別呢？哈哈。 唔止男裝，女裝都有，其實成間舖D野都非常沙灘feel! 連民族袋款同背囊都有得賣，價錢都好抵！入長洲記得黎探下肥老闆啦！ 莎嘩哋Club Sawadee Club 地址：長洲新興街69號地下 電話：97484846

長洲塗鴉拉麵館－狸小路 長洲的日式餐廳不多，十月份在大新後街開了一間新的拉麵店 狸小路！ 狸小路最引人注目的就是這幅巨型玻璃塗鴉牆，慢慢看著就把我吸了入去了。 我進店後問問老闆這些塗鴉是否藝術家畫的，他答我這塗鴉牆聽說是出自一位女醫生的手筆。真是完全猜不到。而客人原來也可以在玻璃上塗鴉留念！ 店內的價錢非常親民，一般主食都是＄40-＄60，午市更有優惠套餐（＄36-40) 。 而這家拉麵店的豬骨湯（內有店內豬骨湯製作的影片）也不錯，＄40的拉麵中算是有交足功課！我們點了兩款拉麵試試，第一款就是日式豬軟骨豚骨湯拉麵。湯頭算濃郁，也不太咸，麵質不差，硬度適中。是合格之作，豬軟骨有微量騷味，但口感和味道都可以，以茶餐廳的價錢吃到這種拉麵是絕對收貨的。 而另一碗就是長洲地獄豚骨湯拉麵。湯頭有點辣，但配料就較普通，蟹柳魚蛋是主角，但是兩者都是一般貨色，豚肉跟豬軟骨應該會比較推薦！ 雖然食物質素不是令人雙眼發光，但是這?的環境舒適，工作人員超級友善，是一間充滿人情味的街坊小店！推介！ P.S 現時小店還搞送餐飲活動，只要在店內LIKE他們的FACEBOOK就可以免費獲得涷飲一杯了！ 地址：長洲大新後街144號地下 狸小路 Facebook